Japanske Fumiko Hayashis debutverk "Lausgjengar" er inspirert av Knut Hamsuns "Sult", og med utgangspunkt i livet sitt har ho skrive ein opprørsk og djerv roman. "Lausgjengar" er eit slags motstykke til den klassiske japanske dagboktradisjonen, der kvinner frå aristokratiet skreiv vakre dagbøker med melodramatiske dikt. Hovudpersonen i romanen er ei ung kvinne i Japan på 20-talet. Livet hennar er tungt, ho er ein fattig omstreifar, vekslar stadig mellom dårleg betalte jobbar og vert stadig skuffa. Men ho gir ikkje opp, alltid driven av ein lengsel etter mat, ein stad å bu, pengar og kjærleik. Romanen er rå, upolert og direkte, men er også humoristisk og poetisk. "Lausgjengar" vert i dag rekna som eit av dei viktigaste verka i japansk litteratur. Omtalen er utarbeidd av BS.
