Pionerverket inneheld 150 illustrasjonar frå vel 100 år med norskproduserte malebøker for barn. Einar Økland har i 40 år samla og kartlagt fleire hundre malebok-titlar. Her gir han ei kronologisk og perspektivrik framstilling, med døme på dei utanlandske forløparane før vi frå 1890-talet fekk dei første norskproduserte produkta. Boka viser korleis store og mindre forlag nytta kjende og mindre kjende kunstnarar i produksjonen av ein boksjanger som ingen hittil har analysert og som berre sporadisk er registrert. Som bruksbøker er sjangren å rekne som sjølvdestruerande, men Økland har valt å vise både ubrukte forelegg og "brukte" sider. Boka dokumenterer og synleggjer eit allment kjent, men usynleggjort og underkjent kulturhistorisk fenomen.
